TOSHKENT VAKSINA VA ZARDOBLAR ILMIY-TADQIQOT INSTITUTIGA XUSH KELIBSIZ!

100 йилдан ортиқ тарихга эга бўлган Тошкент вакцина ва зардоблар илмий-тадқиқот институти, Хозирги кунда деярли 100 йил олдинги жараёнларни ўз бошидан ўтказаяпти десак, муболаға қилмаган бўламиз. Институтнинг тамол тоши 1918 йил 17 сентябрда Туркистон Республикаси Соғлиқни сақлаш халқ комиссарлигининг бўйруғи билан Тошкентда микробиологик лаборатория ташкил этиши билан қўйилди. Ушбу лаборатория кейинчалик Эпидемиология ва микробиология институтига айланди. Ўша даврда нафақат Республикада, балки бутун Ўрта Осиёда чечак, вабо каби касалликлар кенг тарқалган бўлиб, эпидемиологик вазият нихоятда оғир эди. Шу сабабли институт бутун имкониятларини ушбу касалликларни бартараф қилишга ва Республикада умумий эпидемиологик вазиятни яхшилашга йўналтирди. 1950 йилга келиб, институтда қатор янги лабораториялар ва бўлимлар ташкил этилиб, алохида бакпрепаратлар ишлаб чиқарадиган бўлимлар ишга тушди. Шу йили СССР Вазирлар Кенгашининг қарори билан институт Тошкент вакцина ва зардоблар илмий-тадқиқот институти деб ўзгартирилди ва СССР Соғлиқни сақлаш Вазирлиги тасарруфига ўтказилди. Институт ўз ишлаб чиқариш бўлимига эга бўлиб, илмий тадқиқотлар натижасидаги ишланмалар, яратилган дори воситалари, вакцина ва зардоблар ва ташхис воситалари шу бўлимда амалиётга тадбиқ этилиб борилди. Институтдан чиққан биринчи илмий ишлар вабо ва чечак билан курашиш муаммосига бағишланган. Институт асосий фаолиятининг ўсиши билан бир қаторда илмий мавзулар ҳам кенгайиб борди ва шу билан бирга ишлаб чиқариладиган бактериологик препаратлар тури ҳам кенгайди. Ичак инфекциялари, томчи инфекциялари, дифтерия, қизамиқ, пневмония микробиологияси эпидемиологиясини ўрганиш бўйича муҳим ишлар олиб борилди. Паразитар касалликлар - лейшманиоз, спирохетоз, гелминтиозни ўрганиш бўйича ишлар кенг миқёсда олиб борилди.